ភ្នំពេញ៖ រដ្ឋបាលរាជធានីភ្នំពេញ បានរៀបចំទីតាំងចំណតផ្ញើកង់ ម៉ូតូ ដោយឥតគិតថ្លៃ ចំនួន ២កន្លែងនៅមុខពហុកីឡដ្ឋានជាតិមរតកតេជោ សម្រាប់ពលរដ្ឋដែលអញ្ជើញមកចូលរួមការប្រកួតកីឡាស៊ីហ្គេមចាប់ពីថ្ងៃទី០៥ ខែឧសភា ឆ្នាំ២០២៣ តទៅរហូតដល់ចប់ការប្រកួត។
គូសបញ្ជាក់ថា ព្រឹត្តិការណ៍ប្រកួតស៊ីហ្គេមនឹងចាប់ផ្តើមធ្វើឡើងពីថ្ងៃទី០៥-១៧ ខែឧសភា ហើយព្រឹត្តិការណ៍ប្រកួតកីឡាប៉ារ៉ាហ្គេម (ជនពិការភាព) នឹងធ្វើឡើងពីថ្ងៃទី០៣-០៩ ខែមិថុនា ឆ្នាំ២០២៣ ដោយមានការប្រកួតកីឡាសរុបចំនួន ៣៧ប្រភេទ ស្មើនឹងជាង ៥០០វិញ្ញាសា។
ពិធីបើកព្រឹត្តិការណ៍ស៊ីហ្គេមនៅថ្ងៃនេះ នឹងក្លាយជាប្រវត្តិសាស្ត្រដ៏ផូរផង់ ក្រោយខកខាកធ្វើជាម្ចាស់ផ្ទះរៀបចំអស់រយៈពេល ៦៤ឆ្នាំមកហើយ។ ដូច្នេះពលរដ្ឋអញ្ជើញចូលរួមអបអរសាទរព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមឱ្យបានអធឹកអធម។
សម្រាប់ពលរដ្ឋដែលមិនមានសំបុត្រចូលទស្សនាការបើក និងបិទព្រឹត្តិការណ៍ស៊ីហ្គេម អាចអញ្ជើញទស្សនាការផ្សាយផ្ទាល់តាមស្លាយ ដែលចាក់បញ្ចាំងនៅសួនច្បារមុខវត្តបទុមវតី នៅសួនច្បារមាត់ទន្លេទល់មុខភោជនីយដ្ឋានមេត្រ ក្នុងបុរីប៉េងហួតបឹងស្ងោរ សួនច្បារមិត្តភាពក្បែរក្រសួងការពារជាតិ សួនច្បារទល់វិទ្យាស្ថានស្រាវជ្រាវ និងអភិវឌ្ឍន៍ព្រៃឈើ-សត្វព្រៃ ខណ្ឌសែនសុខ សូនច្បារព្រះនាងប្រាជ្ញាបារមី និងទីលានប្រជាធិបតេយ្យ៕
